Rom 10 | PONPDN | STEP | RI ai kan, inon en monion i, o ai nidinid kin irail on Kot pan dore ir ala.

Romans 10

1 RI ai kan, inon en monion i, o ai nidinid kin irail on Kot pan dore ir ala. 2 Pwe nai kadede parail me re kin nantion Kot ap sasa tiak. 3 Pwe re sasa pun en Kot, ap soson kapwaiada pein arail pun ap sota duki on pun en Kot. 4 Pwe Kristus kaimwisok pan kapun o; karos me poson en pun kila. 5 Pwe Moses masanier duen pun en me pwili san kapun o: Aramas o, me kapwaiada son pukat, a pan maur kila. 6 A iet me pun, me pwili san poson, kin inda: Der inda nan monion om: Is me pan daudala nanlan? let wewe: En wadido Kristus. 7 De is me pan daudi wasa lol? let wewe: En wadado Kristus san ren me melar akan. 8 A da me a kin inda? Masan me koren ion uk, a kin mi nan au om o nan monion om; iei masan en poson, me se kin padaki wei. 9 Pwe ma koe pan kadedeki au om Iesus, me i me Kaun, ap poson nan monion om, me Kot Kotin kaiasadar i san ren me melar akan, koe ap pan doro kila. 10 Pwe poson kin tapi san nan monion o, pwen pun kila, o kadede kin tapi san nan au o, pwen maurkila. 11 Pwe kisin likau me masan i: Amen amen me pan poson i, sota pan soredi. 12 Pwe sota irair eu nan pun en men Sus o men Krik, pwe Kaun en irail karos me ta men, me dir en kalanan on karos, me kin likwir on i; 13 Pwe amen amen me likwir on mar en Kaun o pan dore kila. 14 A iaduen, irail pan likwirlan i, me irail sota poson? A iaduen, irail pan kak poson i, me re saikenta ron? A iaduen irail pan kak ron, ma sota saunpadak? 15 A iaduen, irail pan kak padaki wei, ma re sota pan pakadarala? Duen a intinidier: Meid pai na en me padaki ronamau en popol, me padaki ronamau en me mau kan! 16 A kaidin karos me peiki on ronamau. Pwe Iesaia masani: Main, is me kamelele at padak? 17 Ari, poson kin pwili san padak, a padak kin pwili san masan en Kot. 18 A nai me inda: Irail sota ronadar? O ei! Pwe nil arail leler sap karos, o ar padak lel on irair en sappa. 19 A nai me inda: Israel sota wewekier? Pwe iet kaieu, me Moses masani: I pan kasarowei kin komail, me kaidin nai aramas, o I pan kamakara kin komail aramas pweipwei kan. 20 A Iesaia kelail masani: Nai me kadiarokada san ren me sota rapakin ia, o Nai me pwara don, me sota idok ia. 21 A kotin masani duen Israel: Kaukaule I kapawei pa i kat on aramas katiwo o kanudi kan.